कांग्रेसले दियो चेतावनी– ‘मिडिया काउन्सिल विधेयकविरुद्ध आन्दोलन गर्ने’

32

जनकपुर । प्रमुख प्रतिपक्षी दल नेपाली कांग्रेसले विवादास्पद मिडिया काउन्सिल विधेयक विरुद्ध आन्दोलन गर्ने चेतावनी दिएको छ । नेपाल प्रेस युनियन धनुषाको एक कार्यक्रममा कांग्रेसका उपसभापति विमलेन्द्र निधीले पत्रकार र प्रेस जगतको स्वतन्त्रतामाथि अंकुश लगाउने गरि ल्याइएको मिडिया काउन्सिल विधेयकविरुद्ध आफ्नो पार्टीले आन्दोलन गर्ने चेतावनी दिएका हुन् । पूर्व गृहमन्त्री समेत रहेका उपसभापति निधिले प्रेस जगत र पत्रकारलाई मर्या्दित बनाउन प्रेस काउन्सिल ऐन हुँदाहुँदै मिडिया काउन्सिल विधेयक ल्याउनुको कुनै औचित्य नरहेको बताएका छन् ।

उनले भने, ‘सरकारले मिडियामाथि आफ्ना नियन्त्रण राख्न नियतवश ल्याइएको यो एउटा अधिनायकवादको नीति हो । प्रेस जगतलाई अझै मर्या्दित बनाउनुपर्ने र थपघट कुरा समावेश गर्न आवश्यकता थियो । प्रेस काउन्सिल ऐनलाई संशोधन वा परिमार्जन गर्न सकिन्थ्यो तर यसप्रकार दुई तिहाई बहुमतको हैकमवादी देखाएर आफ्ना मन्त्रालयको एउटा शाखाको रुपमा मिडिया काउन्सिल ल्याएर प्रेसको स्वतन्त्रतामाथि अंकुश लगाउनु गलत हो ।’

यस्तै, मिडिया काउन्सिल विधेयकमा पत्रकारलाई एक करोड रुपैयाँसम्म जरिवाना र १५ वर्षसम्म जेल सजायको व्यवस्था राख्नुले नै सरकार अधिनायकवादी बाटोमा हिँडिरहेको स्पष्ट भइसकेको आरोप उनको छ । उनले भने, ‘यसको विरुद्धमा हामी छौँ, आवश्यकता परे पत्रकारको समन्वयमा आन्दोलन गर्नेछौँ ।’

निधिले प्रेस स्वतन्त्रतामाथि आक्रमण गर्नु लोकतन्त्रमाथिको आक्रमण भएकाले तत्काल मिडिया काउन्सिल विधेयक फिर्ता लिन माग गरेका छन् । यो मिडिया काउन्सिल, विज्ञापन र सूचना प्रविधि सम्बन्धी विधेयक लगायतका कानूनको नाममा प्रेस स्वतन्त्रतामाथिको आक्रमण गलत हो र यो नेपाली कांग्रेसलाई सह्य हुदैन भन्दै आवश्यकता परे आन्दोलनमा जाने चेतावनी दिए ।

Comments are closed, but trackbacks and pingbacks are open.